(AR Media Group)မတ်လ ၁၁. ရက် ၊၂၀၂၅

အပြည်ပြည်ဆိုင်ရာ ရွှေ့ပြောင်းနေထိုင်သူများအဖွဲ့ (IOM) သည် အင်ဒိုနီးရှားနိုင်ငံရှိ ရိုဟင်ဂျာဒုက္ခသည်များအတွက် လူသားချင်းစာနာထောက်ထားမှုဆိုင်ရာ အကူအညီများ ပြန်လည်ပေးအပ်ခဲ့ကြောင်း ကြေငြာခဲ့သည်။

အကြီးမားဆုံးအလှူရှင်နိုင်ငံဖြစ်သည့် အမေရိကန်ပြည်ထောင်စုမှ သိသိသာသာ ရန်ပုံငွေဖြတ်တောက်မှုကြောင့် အင်ဒိုနီးရှားရှိ ရိုဟင်ဂျာဒုက္ခသည် ၉၀၀ ကျော်အတွက် အကူအညီများ လျှော့ချရန် ဖိအားပေးခံခဲ့ရကြောင်း ပြီးခဲ့သည့်သီတင်းပတ်က ရိုက်တာသတင်းတွင် ဖော်ပြထားသည်။ သို့သော်လည်း IOM ၏ အင်ဒိုနီးရှားနိုင်ငံဆိုင်ရာ မစ်ရှင်အကြီးအကဲ Jeff Labovitz က ဆူမားတြားအနောက်ပိုင်း Pekanbaru တွင် ခိုလှုံနေသော ရိုဟင်ဂျာဒုက္ခသည်များအတွက် လူသားချင်းစာနာထောက်ထားမှုဆိုင်ရာ အကူအညီများ ထပ်မံပေးအပ်ခဲ့ကြောင်း Reuters နှင့် တွေ့ဆုံမေးမြန်းခန်းတွင် ယနေ့ အတည်ပြုပြောကြားခဲ့သည်။

ထို့အပြင် အကူအညီများ လျှော့ချရန် လတ်တလော အစီအစဉ် မရှိကြောင်း ၎င်းက ပြောသည်။ သို့သော်လည်း အသေးစိတ် အချက်အလက်များကိုမူ ၎င်းက ပြောကြားခြင်း မရှိပေ။

သီးခြား အီးမေးလ် တုံ့ပြန်မှုတွင်၊ IOM သည် ဒုက္ခသည်များအတွက် ရန်ပုံငွေဆိုင်ရာ စိန်ခေါ်မှုများကို ဖြေရှင်းရန် အခြားနည်းလမ်းများကို ရှာဖွေခဲ့ကြောင်း ဖော်ပြခဲ့သည်။ လူသားချင်းစာနာထောက်ထားမှုအကူအညီအတွက် လိုအပ်သောအရင်းအမြစ်များကို ဆက်လက်ရရှိနိုင်မည်ဖြစ်ကြောင်း အဆိုပါအဖွဲ့အစည်းက အာမခံပါသည်။ဂျကာတာရှိ အမေရိကန်သံရုံးကလည်း မှတ်ချက်တစ်စုံတစ်ရာမပေးသေးပါ။ကုလသမဂ္ဂ၏အဆိုအရ အင်ဒိုနီးရှားတွင် ရိုဟင်ဂျာဒုက္ခသည် ၂၈၀၀ ခန့်ရှိသည်။

AR Media Group မှ တင်ပြသည်။